Бібліятэка Redux

У гэтым дапаможніку мы пазнаёмімся з вельмі карыснай і каштоўнай JavaScript бібліятэкай Redux. Назва бібліятэкі бярэ пачатак ад двух слоў - назвы функцыі reduce і архітэктуры Flux прыкладанняў на React, у аснове якой ляжыць выкарыстанне аднанакіраванага патоку даных.

Перш за ўсё Redux - гэта прадказальны кантэйнер або сховішча станаў даных прыкладання. Мы ўжо сустракаліся з паняццем стану або стэйту (state) пры вывучэнні дапаможніка React. З дапамогай Redux можна пісаць кліенцкія, серверныя або натыўныя прыкладанні, якія паводзяць сябе прадказальна, лёгка маштабуюцца і тэсцуюцца.

Чым жа яшчэ прывабны Redux? Ён дапамагае нам кіраваць глабальным станам прыкладання. Інструменты і тэхнікі, якія выкарыстоўваюцца ў Redux, дазваляюць лягчэй зразумець дзе, чаму і якім чынам памяняўся стэйт, а таксама як павядзе сябе логіка прыкладання ў выпадку такіх зменаў.

Redux - гэта самастойная бібліятэка, але яе можна выкарыстоўваць у сувязцы з такімі папулярнымі фрэймворкамі, як React, Angular, Vue, а таксама чыстым JavaScript. Забягаючы крыху наперад, скажу, што ў нашым дапаможніку мы будзем выкарыстоўваць сувязку з React.

Нягледзячы на важнасць гэтага інструмента, пры стварэнні прыкладання варта разумна ацаніць неабходнасць яго прымянення. Вам патрэбен Redux, калі ў вас вялікая колькасць стэйтаў, неабходных у розных частках прыкладання, альбо стэйты змяняюцца вельмі часта, або ў вас занадта складаная логіка для абнаўлення стэйтаў.