Գլխավոր և խաչադիր առանցքները CSS-ի ֆլեքս բլոկներում

Ֆլեքսբոքսների մասին կարելի է խոսել երկու տերմինաբանությամբ. առաջինը՝ տող կամ սյունակ, երկրորդը՝ առանցքների տերմինաբանությամբ: Տողերի և սյունակների հետ մենք արդեն ծանոթացել ենք, հիմա եկեք ծանոթանանք առանցքներին: Առանցքների ընկալումը անհրաժեշտ է էլեմենտները հորիզոնական կամ ուղղահայաց դասավորելու համար:

Ֆլեքս էլեմենտների հետ աշխատելիս միշտ գոյություն ունի գլխավոր առանցք և խաչադիր առանցք: Մենք կարող ենք էլեմենտները դասավորել գլխավոր առանցքի երկայնքով և գլխավոր առանցքին խաչադիր: Գլխավոր առանցքը կարող է ունենալ 4 ուղղություն՝ ձախից աջ, աջից ձախ, վերևից ներքև և ներքևից վերև:

Խաչադիր առանցքի ուղղությունը կախված է գլխավոր առանցքի ուղղությունից. եթե գլխավոր առանցքը հորիզոնական է, ապա խաչադիր առանցքն ուղղված է վերևից ներքև, եթե գլխավոր առանցքը ուղղահայաց է, ապա խաչադիր առանցքը ուղղված է ձախից աջ: Խաչադիր առանցքը այլ ուղղություններ ունենալ չի կարող:

Գլխավոր առանցքի ուղղությունը կառավարվում է flex-direction հատկությամբ: Եթե այս հատկությունը ունի row արժեքը, ապա գլխավոր առանցքն ուղղված է ձախից աջ, իսկ եթե արժեքը row-reverse է, ապա աջից ձախ: column արժեքը ուղղորդում է առանցքը վերևից ներքև, իսկ column-reverse արժեքը՝ ներքևից վերև: