Redux အက်ပလီကေးရှင်း၏ အလုပ်လုပ်ပုံ

ယခုအခါ ဝေါဟာရများကို သင်နားလည်ပြီးဖြစ်သည့်အတွက် သင်ရှေ့ဆက်တည်ဆောက်မည့် Redux အခြေခံအက်ပလီကေးရှင်း၏ အဓိကအလုပ်လုပ်ဆောင်ချက်အဆင့်များကို အတိုချုံးကြည့်ရှုနိုင်ပါပြီ။

အက်ပလီကေးရှင်း၏ အလုပ်လုပ်ပုံသည် ကျွန်ုပ်တို့ ယခင်က ဖော်ပြခဲ့သည့်အတိုင်း ဒေတာများ၏တစ်ဘက်သတ်စီးဆင်းမှု သဘောတရားကို အခြေခံပါသည်။

ကနဦးစတင်ခြင်း အဆင့်တွင် (အက်ပလီကေးရှင်း ပထမဆုံးအကြိမ် အလုပ်လုပ်စဉ်) အခြေခံ reducer ကိုအသုံးပြု၍ store ဟုခေါ်သော သိုလှောင်ရာကို ဖန်တီးပါသည်။ Store သည် ၎င်း reducer ကို တစ်ကြိမ်သာ ခေါ်ယူပြီး ၎င်းမှပြန်ပေးသည့်တန်ဖိုးကို ကနဦး အခြေအနေအဖြစ် မှတ်တမ်းတင်ပါသည်။ ပထမဆုံး ပြသခြင်း (rendering) အဆင့်တွင် အက်ပလီကေးရှင်း၏ component များသည် store တွင်မှတ်တမ်းတင်ထားသော လက်ရှိ state ကို အသုံးပြုပါသည်။ ထို့အပြင် ၎င်းတို့သည် state ပြောင်းလဲမှုကို ချက်ချင်း သိရှိနိုင်ရန် store အားအပ်ဒိတ်လုပ်ခြင်းများအတွက် စာရင်းသွင်းထားပါသည်။

အက်ပလီကေးရှင်း ဆက်လက်လုပ်ဆောင်နေစဉ်အတွင်း အောက်ပါအတိုင်း ဖြစ်ပျက်ပါသည်။ ဥပမာအားဖြင့် အသုံးပြုသူသည် ခလုတ်တစ်ခုအား မောက်စ်ဖြင့် နှိပ်လိုက်သည်ဆိုပါစို့။ ထိုသို့သောအခြေအနေတွင် ကုဒ်ကိုအသုံးပြု၍ action တစ်ခုဖွဲ့စည်းပြီး ယင်းကို store သို့ပေးပို့ပါသည်။ Store သည် ၎င်းအတွင်းသိုလှောင်ထားသော state နှင့် ရရှိလာသော action ကိုအသုံးပြု၍ reducer ကို နောက်တစ်ကြိမ် ပြန်လည်အလုပ်လုပ်စေပါသည်။ ရလဒ်အနေဖြင့် ပြောင်းလဲသွားသော state တန်ဖိုးအသစ်ကို သိမ်းဆည်းပါသည်။ ထို့အပြင် store သည် ပြောင်းလဲမှုများအတွက် စာရင်းသွင်းထားသော component များအား ပြောင်းလဲမှုများရှိကြောင်း အသိပေးပါသည်။ Component များကလည်း ၎င်းတို့လိုအပ်သော state ၏ အစိတ်အပိုင်းများ ပြောင်းလဲခဲ့ပါက စစ်ဆေးကြည့်ရှုပါသည်။ နောက်ဆုံးတွင် ပြောင်းလဲမှုများ ရှိခဲ့ပါက component သည် ဒေတာအသစ်များကိုပြသရန် ပြန်လည်ပြသခြင်း (rendering) လုပ်ငန်းစဉ်ကို စတင်ပါသည်။